សកម្មភាពការងារកន្លងមក

        

ក្រោយបង្កើតក្រុមការងារលេខាធិការដ្ឋានថ្មី ឯកឧត្តម ឈុំ ម៉េងហុង បានដឹកនាំក្រុមការងារប្រជុំចំនួន៥លើក បានចុះទស្សនកិច្ចដល់ទីតាំងរក្សាបេតិកភណ្ឌឯកសារចំនួនពីរលើក និងបានរៀបចំសិក្ខាសាលាផ្សព្វផ្សាយអំពី ស្មារតីចងចាំពិភពលោកចំនួនមួយលើក។

៣.១ កិច្ចប្រជុំ

កិច្ចប្រជុំចំនួនប្រាំលើកដែលរៀបចំឡើង គឺដើម្បីដាក់ទិសដៅ និងលើកផែនការសកម្មភាពការងារដោយគិតគូរយ៉ាងល្អិតល្អន់ក្នុងការរិះរកមធ្យោបាយធ្វើយ៉ាងណា ឲ្យគណៈកម្មាធិការស្មារតីចងចាំពិភពលោកមានដំណើរការកាន់តែប្រសើរ។

• លើកទី១ ៖ ថ្ងៃទី១២ ខែតុលា ឆ្នាំ២០២២ ផ្ដោតលើចំណុចសំខាន់៤ ៖
• ប្រកាសមាសភាពថ្មី នៃក្រុមការងារលេខាធិការនៃគណៈកម្មាធិការជាតិស្មារតីចងចាំពិភពលោក និងការរៀបចំដំណើរការនៃការងារ។
• ពិភាក្សាអំពីការធ្វើរបាយការណ៍៤ឆ្នាំ ទាក់ទងនឹងការពិគ្រោះយោបល់លើកទី២ លើការអនុវត្ត អនុសាសន៍ឆ្នាំ២០១៥ ស្ដីពីការអភិរក្ស និងការចូលទៅកាន់បេតិកភណ្ឌឯកសាររួមទាំងទម្រង់ឌីជីថល ដើម្បីផ្ញើទៅអង្គការយូណេស្កូ។
• កិច្ចការបកប្រែជាភាសាខ្មែរ ស្ដីពីការអភិរក្សនិងការចូលអនុសាសន៍ឆ្នាំ២០១៥ «ទៅកាន់បេតិកភណ្ឌឯកសាររួមទាំងទម្រង់ឌីជីថល»។

ពិភាក្សាលើគម្រោងរៀបចំសិក្ខាសាលា ដើម្បីផ្សព្វផ្សាយអំពីបេតិកភណ្ឌឯកសារដែលបានចុះក្នុងបញ្ជីស្មារតីចងចាំពិភពលោក និងពិនិត្យលទ្ធភាពលើការរៀបចំបញ្ជីថ្នាក់ជាតិ ដើម្បីតៀមនឹងចុះបញ្ជីតំបន់/អន្តរជាតិនាពេលអនាគត។